Наманган вилоятида жинсий зўравонликка оид мурожаат бўйича далилларни сохталаштирганликда айбланган собиқ терговчига нисбатан озодликдан маҳрум қилиш жазоси тайинланди.
Суд ҳужжатларига кўра, Давлатобод тумани Ички ишлар бўлими ҳузуридаги тергов бўлимида катта терговчи лавозимида ишлаган Д.О. жабрланувчи аёлнинг аризаси бўйича қонун талабларига зид қарор қабул қилган.
Маълум қилинишича, 2025 йил март ойида Д.К. исмли аёл ҳуқуқни муҳофаза қилувчи органларга мурожаат қилиб, бир шахс уни зўрлик ишлатган ҳолда жинсий алоқага мажбурлаганини билдирган. Суд-тиббий экспертиза хулосасида жабрланувчининг танасида турли жароҳатлар ва жинсий тажовуз эҳтимолини кўрсатувчи излар аниқланган.
Шунга қарамасдан, терговчи гумонланувчи ҳаракатларида жиноят аломатлари мавжуд эмас, деган хулосага келиб, жиноят иши қўзғатишни рад этган.
Тергов жараёнида аниқланишича, у гумонланувчи номидан тушунтириш хати тайёрлаб, унга жабрланувчи жинсий алоқага ўз ихтиёри билан рози бўлгани ҳақидаги маълумотларни киритган. Кейинчалик ўтказилган экспертиза мазкур ҳужжатдаги ёзув ва имзолар гумонланувчига тегишли эмаслигини тасдиқлаган.
Шунингдек, собиқ терговчи прокуратуранинг қарорни қонуний деб топгани ҳақида сохта ҳужжат расмийлаштириб, унда прокурор ўринбосарининг электрон имзосини ҳам қалбакилаштиргани маълум бўлган.
Материалларга кўра, кейинчалик прокуратура рад этиш қарорини бекор қилиб, ишни қўшимча текширувга қайтарган. Шундан сўнг терговчи фош бўлишидан қўрқиб, айрим ҳужжатларни йўқ қилиб юборган.
Судда таъкидланишича, ўз вақтида чора кўрилмагани оқибатида озодликда қолган хавфли рецидивист кейинчалик яна бир нечта оғир жиноятларни содир этган. Жумладан, у 13 ёшли қизга нисбатан жинсий зўравонлик қилган ва бошқа бир аёлнинг номусига тегган. Кейинчалик мазкур шахс қўлга олиниб, 9 йил муддатга озодликдан маҳрум этилган.
Жиноят ишлари бўйича Наманган шаҳар суди собиқ терговчини мансаб ваколатини суиистеъмол қилиш, мансаб сохтакорлиги ва далилларни қалбакилаштиришда айбдор деб топиб, 3 йил 1 ойга озодликдан маҳрум қилган.
Кейинчалик вилоят суди апелляция инстанциясида ишни қайта кўриб чиқиб, айблов моддаларидан бирини чиқарган ва собиқ терговчининг жазосини 3 йил 25 кун этиб белгилаган.
