Ўзбекистон миллий терма жамоаси бош мураббийи Фабио Каннаваро Жаҳон чемпионати–2026 гуруҳ босқичининг иккинчи турида Португалиядан учралган йирик мағлубиятдан кейин ўз фикрларини билдирди.
Италиялик мутахассис матбуот анжуманида сўзга чиқиб, натижага қарамай шогирдларининг ҳаракатидан мамнун эканини таъкидлади. Унинг айтишича, мундиалдаги иштирок Ўзбекистон терма жамоаси учун муҳим тажриба вазифасини ўтамоқда.
"Жаҳон чемпионатидаги илк иштирок осон кечмаслигини билардик. Қуръа ташланганидан кейин Колумбия ва Португалия каби рақиблар билан бир гуруҳдан ўрин олганимиздаёқ олдимизда жиддий синовлар турганини тушунгандик.
Колумбияга қарши ўйиндан кейин ҳам жамоам билан фахрланишимни айтган эдим. Бугун ҳам шу фикрдаман. Мен футболчиларимнинг майдонда қандай курашганини кўрдим. Ҳа, улар қийин вазиятларга тушиб қолишди, аммо бир лаҳза ҳам таслим бўлишмади.
Барча чизиқларда юқори савиядаги футболчиларга эга жамоага қарши ўйнаш ҳар доим мушкул. Португалия бугун юқори мотивация билан ҳаракат қилди. Шу билан бирга, бу турнир биз учун келажакда асқотадиган катта тажриба мактабидир", — деди Каннаваро.
Маълумот учун, Ўзбекистон миллий терма жамоаси Жаҳон чемпионати гуруҳ босқичининг учинчи турида Конго Демократик Республикасига қарши баҳс олиб боради. Учрашув 28 июнь куни Тошкент вақти билан соат 04:30 да бошланади.
