Нидерландияда 12 ёшга тўлмаган оғир хасталикка чалинган болага нисбатан илк бор эвтаназия амалга оширилди. Бу ҳақда маҳаллий OAV хабар берди.
Маълум қилинишича, мазкур ҳолат 2023 йилда эвтаназия тўғрисидаги қонунга киритилган ўзгаришлардан кейин қайд этилган биринчи ҳолат ҳисобланади. Нидерландия Соғлиқни сақлаш вазири Софи Херманснинг билдиришича, муолажа ўтган йилнинг охирида ўтказилган.
Ҳолат юзасидан махсус комиссия текширув ўтказиб, эвтаназияни амалга оширган шифокор билан суҳбатлашган ва ўз хулосасини назорат органига тақдим этган.
Вазир боланинг аниқ ёши, ташхиси ва эвтаназия қачон ўтказилгани ҳақида маълумот очиқламаган.
Нидерландия эвтаназияни тиббий амалиёт сифатида қонунийлаштирган дунёдаги биринчи давлат ҳисобланади. Мамлакатда бу амалиёт 2002 йилдан буён қонун доирасида қўлланиб келинмоқда.
2023 йил апрель ойида эса мамлакат ҳукумати эвтаназия бўйича ёш чекловларини юмшатган. Янги тартибга кўра, оғир ва даволаб бўлмайдиган касалликка чалинган вояга етмаган беморларга нисбатан қарор шифокорлар ва ота-оналар иштирокида қабул қилинади.
Қонунчиликка мувофиқ, эвтаназия фақат беморнинг аҳволини паллиатив ёрдам орқали енгиллаштириш имкони бўлмаган, у кучли азоб чекаётган ва касаллиги давосиз деб топилган ҳолатларда қўлланилиши мумкин. Шунингдек, қарор қабул қилиш жараёнида боланинг фикри ҳам инобатга олинади.
Кейинчалик махсус комиссия шифокорнинг ҳаракатлари амалдаги тиббий стандартлар ва этик талабларга мос келган-келмаганини баҳолайди. Комиссия таркибига шифокорлар, ҳуқуқшунос ва этика соҳаси мутахассислари киради.
