Халқаро рейтинг агентлиги Moody’s Ўзбекистоннинг суверен кредит рейтингини бир поғона юқорига кўтариб, уни «Ba2» даражасида «барқарор» прогноз билан баҳолади. Бу ҳақда агентликнинг расмий ҳисоботида маълум қилинди.
Мазкур қарор Ўзбекистоннинг иқтисодий барқарорлиги, давлат молиясини бошқариш тизими ва сўнгги йилларда амалга оширилаётган ислоҳотларга берилган ижобий баҳо сифатида баҳоланмоқда. Аввалроқ мамлакатнинг Moody’s рейтинг баҳоси «Ba3» даражасида бўлган бўлса, эндиликда у «Ba2» поғонасига кўтарилди.
Мутахассисларга кўра, кредит рейтингининг яхшиланиши Ўзбекистон учун халқаро молия бозорларида янада қулай шартларда маблағ жалб қилиш имкониятини кенгайтиради. Бу эса ташқи қарз маблағларининг арзонлашиши, инвестициявий жозибадорликнинг ошиши ва янги иқтисодий лойиҳаларни амалга ошириш учун қўшимча имкониятлар яратиши мумкин.
Қайд этилишича, рейтингнинг оширилиши мамлакат иқтисодиётидаги ислоҳотлар, макроиқтисодий барқарорликни таъминлаш ҳамда хусусий секторни қўллаб-қувватлаш бўйича кўрилган чора-тадбирлар натижаси сифатида баҳоланмоқда.
Маълумот учун, Moody’s дунёдаги энг йирик халқаро рейтинг агентликларидан бири ҳисобланади. Унинг баҳолари халқаро инвесторлар ва молиявий институтлар томонидан мамлакатларнинг қарз мажбуриятларини бажариш қобилиятини баҳолашда муҳим мезон сифатида қабул қилинади.
