Тошкент шаҳрининг Юнусобод туманида ҳовлидаги ҳожатхонага тушиб кетган 5 ёшли қизалоқ Фавқулодда вазиятлар вазирлиги қутқарувчилари томонидан қутқариб қолинди. Бу ҳақда вазирлик матбуот хизмати хабар берди.
Маълум қилинишича, кеча, 25 июнь куни соат 17:33 да Тошкент шаҳар Фавқулодда вазиятлар бош бошқармасига Юнусобод туманидаги “Обиравон” кўчасида жойлашган хусусий уйларнинг бирида 2021 йилда туғилган қизалоқ эҳтиётсизлик оқибатида ҳовлидаги ҳожатхона чуқурига тушиб кетгани ҳақида хабар келиб тушган.
Ҳодиса жойига зудлик билан етиб борган қутқарувчилар қутқарув ишларини бошлаган. Уларнинг бири ҳожатхона чуқурига тушиб, болани олиб чиққан.
Шундан сўнг қизалоққа шифокорлар томонидан зарур тиббий ёрдам кўрсатилган ва у оила аъзоларига топширилган. Ҳозирда унинг аҳволи яхши.
Фавқулодда вазиятлар вазирлиги ота-оналарни фарзандларини назоратсиз қолдирмасликка чақирди.
