Ўзбекистонда кучли таъсир қилувчи дори воситаларини ноқонуний равишда чет элдан олиб кириш, уларни яширин цехларда қадоқлаш ва интернет орқали сотиш билан шуғулланган 6 та яширин цех фаолиятига чек қўйилди. Бу ҳақда Давлат хавфсизлик хизмати маълум қилди.
Маълум қилинишича, ноқонуний фаолият билан шуғулланган шахслар кучли таъсир қилувчи дори воситаларини турли маҳсулотлар ниқоби остида мамлакат ҳудудига олиб кирган. Кейинчалик улар яширин цехларда қадоқланиб, интернет орқали сотувга чиқарилган.
Қайд этилишича, жорий йил давомида ўтказилган тезкор тадбирлар натижасида мазкур йўналишда фаолият юритган 6 та яширин цех фош этилган. Улар ташкилотчиларига нисбатан жиноят ишлари қўзғатилган.
Давлат хавфсизлик хизмати ҳозирда хорижий ҳамкорлар билан биргаликда мазкур ноқонуний фаолиятни чет элдан туриб ташкил этаётган шахсларни аниқлаш ва уларни жавобгарликка тортиш бўйича тезкор тадбирларни давом эттираётганини маълум қилди.
