Ўзбекистон миллий терма жамоасининг собиқ ҳужумчиси Сервер Жепаров 2026 йилги Жаҳон чемпионатида Ўзбекистон терма жамоаси кўрсатган ўйинни кескин танқид қилди. Унинг фикрича, жамоада халқаро даражадаги йирик мусобақалар тажрибаси етишмаган, энг катта муаммо эса тўп билан ўйнаш маданиятида намоён бўлган. Бу ҳақда у “Sports24.kz” нашрига берган интервьюсида сўз юритди.
Жепаровнинг таъкидлашича, Ўзбекистон миллий терма жамоаси учун бу илк Жаҳон чемпионати бўлгани сабабли тажриба етишмаслиги табиий. Унинг фикрича, Колумбия ва Португалия терма жамоалари ўзбекистонлик футболчилардан анча устун бўлган, аммо Конго Демократик Республикаси билан баҳсда бошқача натижа қайд этилиши мумкин эди.
"Биз футболни тўп билан ўйнашни ўрганишимиз керак. Футбол тўп билан ўйналади. Биз эса учала учрашувда ҳам деярли тўпсиз ҳаракат қилдик. Бу Ўзбекистон учун қабул қилиб бўлмайдиган ҳолат. Биз тўпга эгалик қилишимиз, ўйинни назорат қилишимиз керак. Бу бизнинг кучли жиҳатимиз", дейди у.
Собиқ футболчи, шунингдек, жамоанинг ҳужумни ташкил этишдаги ҳаракатларини ҳам танқид қилди. Унинг айтишича, тўпни қайтариб олгандан кейин уни шунчаки олдинга тепиб юбориш замонавий футбол талабларига жавоб бермайди.
"Ҳимояланиш ўйиннинг муҳим қисми. Бироқ тўпни қайтариб олгач, ундан қандай фойдаланиш ҳам тактик жиҳатдан катта аҳамиятга эга. Учрашувлар статистикаси жамоамиз асосан тўпсиз ўйнаганини кўрсатди. Айни пайтда кучли Европа чемпионатларида фаолият олиб бораётган атиги уч нафар футболчимиз бор ва бу жуда кам. Биз тўғри хулоса чиқаришимиз, келгуси Жаҳон чемпионатларига рақобатбардош тарзда тайёргарлик кўриш учун тўрт йилдан саккиз йилгача мўлжалланган стратегия ишлаб чиқишимиз керак. Энг муҳими, кейинги мундиалларда фақат иштирок этиш эмас, балки муносиб ўйин кўрсатишга эришишимиз лозим", дейди Жепаров.
