Тошкент вилоятининг Ангрен шаҳрида юк машинаси иштирокида оғир йўл-транспорт ҳодисаси содир бўлиб, икки киши ҳалок бўлди. Яна бир нечта фуқаролар жароҳат олган.
Маълум қилинишича, 26 апрель куни соат 23:10 атрофида А-373 автомобиль йўлининг 93-километрида Howo русумли юк машинаси ҳайдовчиси бошқарувни йўқотиб, шу йўналишда ҳаракатланаётган 4 та транспорт воситаси билан тўқнашган.
Ҳодиса оқибатида Cobalt автомашинаси ҳайдовчиси ва унинг йўловчиси воқеа жойида вафот этган. Қолган транспорт воситаларида бўлган 4 нафар фуқаро турли даражадаги тан жароҳатлари билан шифохонага олиб борилган.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
