Венесуэланинг Ла-Гуайра шаҳрида содир бўлган кучли зилзилалардан саккиз кун ўтиб, қутқарувчилар вайроналар остида қолган эркакни тирик ҳолда олиб чиқди. Маҳаллий ҳокимият ва халқаро қутқарув гуруҳлари ушбу амалиётни "мўъжизавий қутқарув" деб баҳоламоқда.
Маълум қилинишича, савдо марказида қўриқчи бўлиб ишлаган 43 ёшли Эрнан Гил қулаб тушган автотураргоҳ конструкциялари остида тахминан тўққиз метр чуқурликда қолиб кетган. Уни қидириш ва хавфсиз тарзда олиб чиқиш бўйича операция 70 соатдан ортиқ давом этган.
Қутқарувчилар радар тизимлари, овозни аниқловчи махсус ускуналар ҳамда камералар ёрдамида Эрнан Гилнинг тирик эканини аниқлаган. Шундан сўнг тор бўшлиқ орқали унга сув, озиқ-овқат ва зарур дори-дармонлар етказиб турилган.
Қутқарув ишларида Венесуэла, Чили, Коста-Рика ҳамда бошқа давлатлардан келган мутахассислар иштирок этган. Операция бинодаги конструкциялар исталган вақтда қулаб тушиши мумкин бўлган ўта хавфли шароитда амалга оширилган.
Қутқарувдан сўнг Эрнан Гил шифохонага олиб кетилган. Шифокорлар унинг аҳволи барқарор экани, ҳуши жойида бўлиб, барча ҳаётий кўрсаткичлари меъёрда эканини маълум қилган.
"Яхшиямки, жаноб Эрнан тез ёрдам автомашинасига олиб чиқилиши билан аҳволи барқарорлашди. У шифохонага олиб кетилаётганда ҳушида эди ва атрофидаги вазиятни яхши англаб турарди. Ҳозирда унинг барча ҳаётий кўрсаткичлари меъёрда", деган қутқарув ишларида қатнашган Венесуэла Қизил Хочи фельдшери Луис Родригес.
Эркакнинг рафиқаси Гусвимар Гонсалеснинг айтишича, оила аъзолари саккиз кун давомида унинг тирик қолишига бўлган умидни йўқотмаган. Қутқарув ҳақидаги хабар эса уларга яна бир бор ишонч бағишлаган.
БМТнинг Табиий офатларни баҳолаш ва мувофиқлаштириш гуруҳи вакили Себастьян Мокоркер бундай ҳолатлар жуда кам учрашини таъкидлаган. Унинг сўзларига кўра, зилзиладан кейинги дастлабки 72 соат тирик қолганларни топиш учун «олтин вақт» ҳисобланади. Ушбу муддатдан кейин омон қолиш эҳтимоли кескин пасаяди.
Венесуэла ҳукумати қидирув-қутқарув ишлари ҳали ҳам давом этаётганини маълум қилди. Сўнгги расмий маълумотларга кўра, зилзилалар оқибатида камида 2 минг 295 киши ҳалок бўлган. Қутқарувчилар вайроналар остида яна тирик қолганларни излашда давом этмоқда.
