Президент Шавкат Мирзиёев АҚШ Президенти Дональд Трампни мамлакат мустақиллигининг 250 йиллиги ва Миллий байрам — Мустақиллик куни муносабати билан табриклади. Бу ҳақда Президент матбуот хизмати хабар берди.
Табрик мактубида давлат раҳбари Дональд Трамп ҳамда Америка халқини кўп миллатли Ўзбекистон халқи номидан самимий қутлаб, АҚШнинг иқтисодий қудрати ва халқаро майдондаги ўрни унинг раҳбарлигида янада мустаҳкамланаётганини таъкидлади.
Президент икки мамлакат ўртасидаги муносабатлар ўзаро ҳурмат, ишонч ва муштарак манфаатлар асосида изчил ривожланаётганини қайд этди. Шунингдек, савдо ҳажмини ошириш, қўшма инвестиция лойиҳаларини амалга ошириш, муҳим минерал ресурслар ҳамда инновацион кооперация соҳаларидаги ҳамкорликни кенгайтириш устувор йўналишлардан бири экани таъкидланди.
Мактубда хавфсизлик соҳасидаги ҳамкорликни мустаҳкамлаш, ноқонуний миграция, терроризм, экстремизм, трансмиллий жиноятчилик ва наркотиклар ноқонуний айланмасига қарши курашда саъй-ҳаракатларни кучайтириш муҳимлиги ҳам қайд этилди.
Шунингдек, давлат раҳбари “C5+1” платформаси, БМТ ва бошқа халқаро тузилмалар доирасидаги ҳамкорлик Дональд Трамп қўллаб-қувватлови билан янги босқичга кўтарилишига ишонч билдирди.
Президент Шавкат Мирзиёев жорий йил декабрь ойида Майами шаҳрида бўлиб ўтадиган “Катта йигирмалик” саммити доирасида Дональд Трамп билан учрашувни интизорлик билан кутаётганини ҳам таъкидлади.
