Россия Мудофаа вазирлиги президент Владимир Путинга рус қўшинлари Украина шарқидаги Донецк вилоятида жойлашган Константиновка шаҳрини назоратга олгани ҳақида маълум қилган.
Бироқ Украина президенти Владимир Зеленский бу даъволарни рад этиб, шаҳар ҳануз Украина назоратида эканини билдирган. У, шунингдек, Путинни Константиновкага келиб, урушни тугатиш бўйича музокара ўтказишга чақирган.
4 июль куни ҳарбийлар билан учрашувда Путин Россия бўлинмалари Константиновка устидан назорат ўрнатганини айтган. Унинг сўзларига кўра, бу шаҳарни эгаллаш Славянск–Краматорск–Константиновка йўналишидаги мустаҳкам мудофаа ҳудудини ёриб ўтишнинг биринчи босқичи бўлган.
Зеленский эса бу баёнотни “ёлғон” деб атаб, агар шаҳар Россия назоратида бўлса, Путин ўша ерда учрашув ўтказишга журъат эта олишини таъкидлаган.
Украина Қуролли кучлари Бош штаби ҳам Константиновка Украина кучлари томонидан назорат қилинаётганини маълум қилган. Бош штабга кўра, шаҳардаги вазият мураккаб бўлиб қолмоқда, Россия қўшинлари эса ҳужум ҳаракатларини давом эттирмоқда.
Шунингдек, Россия бўлинмалари кичик пиёда гуруҳлари орқали Украина мудофаа чизиғига кириб боришга уринаётгани, бу эса дронлар кенг қўлланилаётган замонавий жанг майдонининг асосий тактикаларидан бири экани айтилган.
