2026–2027 ўқув йили учун олий ва касбий таълим муассасаларига ўқишга кириш мақсадида онлайн рўйхатдан ўтган абитуриентларга тест синовларида иштирок этиш учун рухсатномаларни бериш бошланди. Бу ҳақда Билим ва малакаларни баҳолаш агентлиги маълум қилди.
Агентлик маълумотига кўра, абитуриентлар “Абитуриент рухсатномаси”ни my.uzbmb.uz платформасидаги шахсий кабинети орқали юклаб олиши мумкин. Бунинг учун жисмоний шахснинг шахсий идентификация рақами (ЖШШИР) ҳамда паспорт серияси ва рақамини киритиш талаб этилади.
Тест синовларида иштирок этиш учун абитуриентлар белгиланган вақтда шахсни тасдиқловчи ҳужжат — паспорт ёки ID-карта ҳамда абитуриент рухсатномаси билан етиб келиши шарт.
Агентлик огоҳлантиришича, паспорт нусхаси ёки бошқа ҳужжатлар билан келган, шунингдек, тест бошланиш вақтига кечиккан абитуриентлар имтиҳонга киритилмайди.
Эслатиб ўтамиз, аввалроқ чет тили фани мавжуд бакалавриат таълим йўналишларига ҳужжат топширган абитуриентларга хорижий тил бўйича В1 даражадаги миллий ёки халқаро сертификат учун максимал баллнинг 75 фоизи берилиши маълум қилинган эди.
