Хитойнинг жануби-шарқида жойлашган Фуцзянь вилоятидаги пойабзал фабрикасида юз берган йирик ёнғин оқибатида камида 28 киши ҳалок бўлди. Бу ҳақда мамлакатнинг "Синьхуа" ахборот агентлиги хабар қилди.
Маълум қилинишича, фожиа 9 июль куни маҳаллий вақт билан соат 12:00 атрофида Фуцзянь вилоятининг Цзиньцзян шаҳрида жойлашган "Huiteng" пойабзал ишлаб чиқариш корхонасида содир бўлган. Ёнғин кўп қаватли ишлаб чиқариш биносини қисқа вақт ичида қамраб олган ва оқибатда бир гуруҳ ишчилар томда қолиб кетган.
Расмий маълумотларга кўра, ёнғин вақтида фабрика ичида 239 нафар ходим бўлган. Уларнинг 213 нафари хавфсиз ҳудудга эвакуация қилинган. Шифохонага ётқизилган икки нафар жабрланувчи кейинчалик вафот этган. Илгари бедарак деб ҳисобланган яна 26 кишининг жасади қутқарув ишлари давомида топилган.
Хабарда айтилишича, Хитой раиси Си Цзиньпин ҳодисадан сўнг зудлик билан кенг кўламли қутқарув ишларини ташкил этиш бўйича топшириқ берган. У сўнгги ойларда мамлакатда ишлаб чиқариш корхоналарида содир бўлган бир қатор ҳалокатли бахтсиз ҳодисаларни эслатар экан, мазкур ёнғин ҳам катта йўқотишларга сабаб бўлганини таъкидлаган ва айбдорларни қонун доирасида қатъий жавобгарликка тортишни талаб қилган.
Дастлабки текширувлар ёнғин фабриканинг биринчи қаватида бошланганини кўрсатмоқда. Мутасаддиларнинг билдиришича, пойабзал ишлаб чиқаришда қўлланиладиган хомашё ва материалларнинг юқори даражада ёнувчанлиги туфайли аланга жуда тез тарқалган.
Шунингдек, CCTV телеканали маълумотига кўра, корхонада сақланган ёпиштирувчи моддалар ва бошқа кимёвий воситалар ўткир ҳид тарқатиб, қутқарувчиларнинг ишини мураккаблаштирган. Бундан ташқари, зинапояларда турли буюмларнинг тўпланиб қолгани эвакуация ва ёнғинни бартараф этиш ишларига жиддий тўсқинлик қилган.
Ҳозирда компания раҳбарлари ҳамда бошқа масъул шахслар қўлга олинган. Корхонанинг банк ҳисобрақамлари музлатилган ва ҳодиса юзасидан тергов ҳаракатлари давом этмоқда.
Маълумот учун, Цзиньцзян шаҳри Хитойнинг энг йирик пойабзал ва кийим-кечак ишлаб чиқариш марказларидан бири ҳисобланади. У кўпинча мамлакатнинг "пойабзал пойтахти" сифатида тилга олинади.
Расмий маълумотларга кўра, шаҳардаги минглаб корхоналар 2024 йилда 1,2 миллиард жуфтдан ортиқ пойабзал ишлаб чиқарган бўлиб, бу жаҳон умумий ишлаб чиқариш ҳажмининг қарийб 20 фоизига тўғри келган.
