Франция терма жамоаси Жаҳон чемпионати чорак финалида Марокашни 2:0 ҳисобида мағлуб этиб, мусобақанинг ярим финалига чиқди.
Учрашувнинг асосий қаҳрамони Килиан Мбаппе бўлди. Франция ҳужумчиси биринчи бўлимда пенальтидан фойдалана олмаган бўлса-да, иккинчи бўлимда гол урди ва яна бир голга ассистентлик қилди.
Ўйиннинг 28-дақиқасида Нуссайр Мазравий жарима майдонида Мбаппега нисбатан қоидабузарлик қилди ва бош ҳакам пенальти белгилади. VAR текшируви бир неча дақиқа давом этгач, қарор ўзгармади. Бироқ Мбаппенинг зарбасини Марокаш дарвозабони Ёсин Буну қайтарди.
Шунга қарамай, иккинчи бўлимда французлар устунликни қўлга олди. 60-дақиқада Мбаппе узоқ масофадан аниқ зарба йўллаб ҳисобни очди. Олти дақиқадан кейин эса унинг узатмасидан Усмон Дембеле жамоасининг иккинчи голини киритди.
Статистика ҳам Франциянинг устунлигини кўрсатди. Дидье Дешам шогирдлари учрашув давомида 22 марта зарба берган бўлса, Марокаш атиги 5 марта хавф туғдира олди. Дарвоза томон йўлланган аниқ зарбалар нисбати 8:1, кутилаётган голлар (xG) кўрсаткичи эса 3,05 га қарши 0,14 ни ташкил қилди.
Бу гол Мбаппенинг жорий Жаҳон чемпионатидаги саккизинчи голига айланди. Шу тариқа у тўпурарлар пойгасида Лионель Мессига етиб олди. Шунингдек, у Жаҳон чемпионатлари тарихидаги умумий голлари сонини 20 тага етказиб, бу борада 21 голга эга Мессига янада яқинлашди.
Бироқ учрашувнинг 77-дақиқасида Мбаппе тўпиғидаги оғриқ сабаб майдонни тарк этди. Унинг ўрнига Жан-Филип Матета туширилди. Ўйиндан кейин французлар сардори жароҳати жиддий эмаслигини маълум қилди.
"Ҳаммаси яхши. Тўпиғимга зарба текканди, лекин жиддий муаммо йўқ. Сўнгги дақиқаларда Матета мендан кўра яхшироқ ҳолатда эди", деди Мбаппе.
Шу тариқа Франция ярим финалга йўл олди. Энди амалдаги жаҳон чемпионлари финал йўлланмаси учун Испания – Бельгия жуфтлиги ғолиби билан куч синашади.
