Жаҳон чемпионати–2026 чорак финалидан ўрин олган Англия — Норвегия баҳсида инглизлар қўшимча бўлимларда 2:1 ҳисобида ғалаба қозониб, мусобақанинг ярим финалига йўлланмани қўлга киритди.
АҚШнинг Майами шаҳридаги "Хард Рок" стадионида бўлиб ўтган учрашувда ҳисобни Норвегия очди. Жамоа ҳужумчиси Андреас Шелдеруп 36-дақиқада рақиб дарвозасини ишғол қилди.
Англия эса биринчи бўлимга қўшиб берилган вақтнинг иккинчи дақиқасида Жуд Беллингемнинг голи эвазига ҳисобни тенглаштирди. Қаҳрамонлигини давом эттирган ярим ҳимоячи қўшимча бўлимнинг 93-дақиқасида яна бир бор аниқ зарба йўллаб, жамоасига ғалабани тақдим этди.
Шу тариқа Томас Тухель шогирдлари ЖЧ–2026 ярим финалига чиқди. Энди Англия финал йўлланмаси учун Аргентина — Швейцария жуфтлиги ғолибига қарши баҳс олиб боради.
Эслатиб ўтамиз, Норвегия чорак финалга қадар Бразилияни 2:1 ҳисобида мағлуб этган бўлса, Англия нимчорак финалда мезбон Мексикани 3:2 ҳисобида таслим этган эди.
