АҚШ Президенти Дональд Трамп бу ҳафта бир неча бор ўзини TikTok платформасида "1-рақамли" деб атади. Бироқ унинг бу баёноти платформадаги энг кўп кузатувчига эга фойдаланувчи эканини эмас, балки жаҳон етакчилари орасида энг машҳур аккаунт соҳиби эканини англатиши маълум бўлди.
Трамп 6 июль куни Оқ уйда журналистлар билан мулоқот чоғида TikTok’да биринчи ўринда турганини айтди. Шунингдек, у америкалик қўшиқчи Тейлор Свифтни ортда қолдирганини ҳам иддао қилди.
Бироқ 9 июль ҳолатига кўра, Трампнинг TikTok’даги расмий саҳифасини 16,7 миллион киши кузатмоқда. Тейлор Свифт эса 33,5 миллиондан ортиқ кузатувчига эга бўлиб, бу кўрсаткич Трамп аудиториясидан қарийб икки баравар юқори.
Платформадаги энг машҳур аккаунт эса сенегаллик ва италиялик блогер Хаби Леймга тегишли. Уни 162,3 миллион нафар фойдаланувчи кузатади. Иккинчи ўринда эса 159,2 миллион кузатувчи билан америкалик блогер Чарли Д’Амелио жойлашган.
"Мен биринчи рақамли эдим. Бу санъаткорларнинг барчаси 27–29-ўринларда. Бу ақл бовар қилмайди. Ўзим ҳам тушунмайман, аммо бу менинг фикрларим одамларга етиб бораётганини англатади", деган Трамп 8 июль куни НАТО саммити доирасидаги чиқишларидан бири вақтида.
5 июль куни Truth Social ижтимоий тармоғида эълон қилинган хабар эса Президентнинг мазкур гапига ойдинлик киритди. Унда TikTok бош директори Шоу Зи Чю Трампни платформадаги энг кўп кузатувчига эга жаҳон етакчиси сифатида табриклагани маълум қилинган. Оқ уй вакиллари ҳам мазкур масала юзасидан сўралган изоҳда айнан шу хабарга ишора қилган.
CNBC таҳлилига кўра, Дональд Трамп ҳақиқатдан ҳам TikTok’даги энг кўп кузатувчига эга давлат раҳбари ҳисобланади. Ундан кейин Сальвадор Президенти Наиб Букеле 12,9 миллион, Мексика Президенти Клаудия Шейнбаум 9,3 миллион ва Франция Президенти Эммануэль Макрон 7,3 миллион кузатувчи билан жойлашган.
Айни пайтда Хитой Раиси Си Цзиньпин, Россия Президенти Владимир Путин ҳамда Яқин Шарқдаги қатор давлат раҳбарларининг TikTok’да расмий аккаунти мавжуд эмас. Исроил Бош вазири Биньямин Нетаньяҳу эса платформада 1,5 миллион кузатувчига эга.
АҚШ ички сиёсатида Трампнинг 2024 йилги президентлик сайловидаги рақиби, собиқ вице-президент Камала Харриснинг TikTok’да 10,1 миллион кузатувчиси бор. Собиқ президентлар Барак Обама ва Жо Байденнинг эса мазкур платформада расмий саҳифаси йўқ.
Трампнинг TikTok саҳифасида асосан Овал кабинетдан туриб давлат сиёсати, ташаббуслар ва қарорлар ҳақидаги қисқа видеомурожаатлар жойланади. Айрим роликлар ҳазиломуз мазмунда ҳам бўлади. Жумладан, 26 май куни эълон қилинган видеолардан бирида у демократларни нима учун "Dumocrats" деб аташини ҳазил тарзида изоҳлаган.
НАТО саммитида Трамп TikTok’дан АҚШнинг ютуқлари ва "коммунизм қанчалик ёмон экани" ҳақида гапириш учун ҳам фойдаланишини билдирган.
Маълумот учун, Дональд Трамп бошқа ижтимоий тармоқларда ҳам катта аудиторияга эга. Унинг X тармоғида 111,7 миллион, Instagram’да 44 миллион ва Truth Social платформасида 12,9 миллион кузатувчиси мавжуд.
