2026 йилги футбол бўйича Жаҳон чемпионатининг илк ярим финал баҳсида Испания терма жамоаси Францияни 2:0 ҳисобида мағлуб этиб, мусобақанинг ҳал қилувчи босқичига йўл олди.
АҚШнинг Техас штати, Арлингтон шаҳрида бўлиб ўтган учрашувда испанларга ғалаба келтирган голларни Микель Оярсабаль 22-дақиқада пенальтидан ва Педро Порро 58-дақиқада киритди.
Шу тариқа Луис де ла Фуэнте шогирдлари ўз тарихида иккинчи бор Жаҳон чемпионати финалига чиқди. Испания бош соврин учун Англия — Аргентина учрашуви ғолиби билан майдонга тушади.
Испания бундан аввал ягона марта 2010 йил Жанубий Африка Республикасида ўтган мундиал финалига чиққан ва ўшанда Нидерландияни қўшимча бўлимларда 1:0 ҳисобида мағлуб этиб, ўз тарихида илк бор жаҳон чемпионига айланган эди.
Франция эса 2014 йилдан буён илк марта Жаҳон чемпионати финалига чиқа олмади. Ўшанда французлар чорак финалда Германияга 1:0 ҳисобида ютқазиб, мусобақани тарк этган, кейинчалик немислар чемпионликни қўлга киритган эди.
Кейинги икки мундиалда Франция юқори натижа қайд этди: 2018 йилда жаҳон чемпиони бўлди, 2022 йилда эса финалга қадар етиб борди. Бироқ ҳал қилувчи баҳсда Аргентинага пенальтилар сериясида имкониятни бой берди.
Эътиборли жиҳати, Испания ва Франция сўнгги учта йирик мусобақада кетма-кет ярим финалда тўқнаш келди.
Испанлар аввал Евро–2024 ярим финалида 2:1, 2025 йилги УЕФА Миллатлар лигаси ярим финалида 5:4 ҳисобида устун келган бўлса, бу сафар ҳам рақибини мағлуб этиб, финал йўлланмасини қўлга киритди.
