АҚШ Президенти Дональд Трамп Эрон билан давом этаётган ҳарбий-сиёсий қарама-қаршилик тез орада Вашингтон фойдасига ҳал бўлишини айтди. Бу ҳақда Zamon.uz маълум қилди.
"Биз тез орада Эронни мағлуб этамиз. Улар жуда тез орада мағлуб бўлади", деди Трамп.
Сўнгги ҳафталарда АҚШ ва Эрон ўртасидаги кескинлик янада кучайди. АҚШ ҳарбий қўмондонлиги маълумотига кўра, 8 июлдан бошлаб Эрон ҳудудидаги бир қатор нишонларга зарбалар берилган. Вашингтон бу амалиётларни Теҳроннинг Ҳормуз бўғози орқали ҳаракатланаётган тижорат кемаларига қарши ҳаракатларига жавоб сифатида изоҳлаган.
Эрон эса бунга жавобан Яқин Шарқдаги айрим АҚШ ҳарбий объектларига зарбалар берганини маълум қилди.
12 июль куни Теҳрон АҚШнинг минтақадаги ҳарбий аралашуви давом этар экан, Ҳормуз бўғозини ёпишини эълон қилди. Орадан кўп ўтмай, Трамп Эронга нисбатан "тўлиқ денгиз блокадаси" жорий этилганини билдириб, бу чора Эрон портларига кираётган ёки у ердан чиқаётган, шунингдек, Эрон юкларини ташиётган барча кемаларга нисбатан татбиқ этилишини маълум қилди.
Шунингдек, АҚШ Президенти аввалроқ Эронни "ўзини яхши тутишга" чақирган ва ҳозирча Теҳрон билан музокараларни қайта тиклаш бўйича аниқ муддат белгилаш нияти йўқлигини таъкидлаган.
