2026 йилги футбол бўйича Жаҳон чемпионатининг Аргентина ва Испания миллий терма жамоалари ўртасида бўлиб ўтадиган финал учрашувига тайинланган ҳакамлар бригадаси маълум бўлди. Бу ҳақда Халқаро футбол федерацияси расмий ахборот берди.
Қайд этилишича, ҳал қилувчи баҳсни словениялик тажрибали ҳакам Славко Винчич бошқаради. Унга қанотларда ҳамюртлари Томаж Кланчник ва Андраж Ковачич ёрдам беради. Тўртинчи ҳакам вазифаси Бирлашган Араб Амирликлари вакили Адҳам Маҳадмеҳга юклатилган. Захира ёрдамчи ҳакам этиб эса Муҳаммад Алқалаф тайинланган.
46 ёшли Славко Винчич ушбу мундиал давомида учта учрашувда ишлади. У Бразилия — Марокаш (1:1), Жазоир — Иордания (2:1) гуруҳ босқичи ҳамда Мексика — Эквадор (2:0) ўртасидаги 1/16 финал баҳсини бошқарган. У Европанинг энг тажрибали ва обрўли ҳакамларидан бири сифатида эътироф этилади. Шу билан бирга, унинг финалга тайинлангани кўплаб мутахассислар учун кутилмаган қарор бўлди.
Бунга қадар аксарият футбол экспертлари ҳал қилувчи учрашувни поляк ҳаками Шимон Марчиняк бошқаришини тахмин қилаётган эди. Бироқ у плей-офф босқичида бирорта ҳам ўйинга тайинланмади. Айрим хорижий нашрлар бу ҳолатни Аргентина — Жазоир учрашувида Лионель Мессига сариқ карточка кўрсатилмагани билан боғлиқ баҳслар таъсир қилган бўлиши мумкинлиги билан изоҳламоқда.
Славко Винчич номи Аргентина мухлисларига яхши таниш. У шу кунгача «албиселесте» иштирокидаги фақат битта расмий учрашувни бошқарган. Бу 2022 йилги Жаҳон чемпионати гуруҳ босқичидаги Саудия Арабистонига қарши баҳс бўлиб, унда Лионель Месси гол урганига қарамай, Аргентина 1:2 ҳисобида мағлуб бўлган эди. Мазкур учрашув мундиал тарихидаги энг йирик сенсациялардан бири сифатида қайд этилган.
Шунга қарамай, Аргентина ўша мағлубиятдан кейин ўзини тиклаб, мусобақа якунида жаҳон чемпионлигига эришган эди. Энди эса орадан тўрт йил ўтиб, Славко Винчич яна Аргентина иштирокидаги Жаҳон чемпионати финалини бошқаради.
