АҚШ президенти Дональд Трамп Канададаги ўрмон ёнғинлари сабаб юзага келган тутун АҚШ ҳудудига тарқалаётгани учун Оттава ҳукуматини танқид қилди. У мазкур ҳолат экологик ва иқтисодий зарар келтираётганини таъкидлаб, Канада товарларига қўшимча тарифлар жорий этиш мумкинлигини билдирди.
Трамп Truth Social тармоғида Канада ўрмонларни самарали бошқармаётганини айтди ва бу вазиятни "қабул қилиб бўлмайдиган" ҳолат деб баҳолади. У Канада бош вазири Марк Карни билан боғланиб, муаммони ҳал қилиш бўйича қандай чоралар кўрилаётганини сўрашини маълум қилди.
АҚШ президентининг сўзларига кўра, Канададаги "беэътиборлик" оқибатида АҚШ ҳар йили миллиардлаб доллар зарар кўрмоқда. Шу сабабли у ҳаво ифлосланишидан келиб чиқадиган иқтисодий харажатлар Канада маҳсулотларига қўлланилаётган тарифларга қўшилиши кераклигини билдирди.
Канада томони эса мамлакат 2020 йилдан буён ўрмонларни ҳимоя қилиш ва ёнғинларнинг олдини олиш ишларига 12 миллиард Канада доллари йўналтирганини маълум қилди. Мамлакат расмийлари АҚШ билан ўрмон ёнғинларига қарши курашиш бўйича кўп йиллик ҳамкорлик мавжудлигини таъкидлади.
Ҳозирда Канададаги йирик ёнғинлар асосан Онтарио вилоятининг шимоли-ғарбий қисмида кузатилмоқда. Ёнғинлар оқибатида юз минглаб гектар ҳудуд зарарланган, минглаб одамлар хавфсиз жойларга кўчирилган.
Мутахассислар иқлим ўзгариши туфайли ўрмонларнинг қуриши ва йирик ёнғинлар кўпайиб бораётганини қайд этмоқда. АҚШда ҳам йил бошидан буён катта майдонларда ёнғинлар қайд этилган.
