2026 йилги Жаҳон чемпионати финали олдидан футбол оламида асосий савол — Испания ёки Аргентина чемпионликни қўлга киритадими, деган масала бўлиб турибди. Финалда амалдаги жаҳон чемпиони Аргентина ва Европа чемпиони Испания тарихда илк бор мундиал финалида ўзаро тўқнаш келади. Собиқ футболчилар мазкур воқеа ҳақида ўз тахмин ва фикрларини билдиришди. Бу ҳақда Al Jazeera хабар берди.
Таҳлилчиларнинг катта қисми Испанияни учрашув фаворити сифатида баҳоламоқда. Собиқ футболчилар Майкл Оуэн, Златан Ибрагимович ва Жон Терри испанлар жамоавий ўйини, тўп билан муомаласи ва ҳужумдаги барқарорлигини алоҳида таъкидлади. Уларнинг фикрича, Испания футболчилари бир-бирини яхши тушунади ва майдонда юқори даражадаги назоратни намойиш эта олмоқда.
Шу билан бирга, Аргентина ҳам финалга катта тажриба ва кучли руҳият билан етиб келди. Мутахассислар Лионель Мессининг сўнгги мундиалида яна бир бор жамоасини олдинга бошлаши, шунингдек, аргентиналик футболчиларнинг муҳим учрашувлардаги босими уларга устунлик бериши мумкинлигини айтмоқда.
Айрим собиқ футболчилар фикрича, финалда Испаниянинг ҳужумкор ва тўп назоратига асосланган услуби Аргентинанинг интизомли ҳимояси ҳамда тезкор қарши ҳужумлари билан тўқнашади. Шу сабабли, мутахассислар бу баҳсни тенг кучли рақиблар ўртасидаги кескин кураш сифатида баҳоламоқда.
Жаҳон чемпионати финали бугун, 19 июль куни Тошкент вақти билан 23:55 да бўлиб ўтади ва унда икки футбол мактаби — Европа услуби ва Жанубий Америка анъаналари ўзаро рақобатлашади.
