Испания терма жамоаси ЖЧ-2026 финалида Аргентина устидан ғалаба қозониб, чемпионликни нишонлаётган бир пайтда эътиборни нафақат Ламин Ямал, балки унинг уч ёшли укаси Кейн ҳам ўзига тортди.
Финал ҳаками якуний ҳуштакни чалганидан сўнг кичик Кейн майдонга тушди. У орқасида акаси Ямалнинг фамилияси ва 19-рақами туширилган футболкада эди. Кейн майдонда акаси томон югуриб бориб, уни бағрига босди.
Аргентинага қарши финалдан сўнг Кейн ўзини ҳақиқий юлдуздек тутди. У акаси билан қучоқлашди, чемпионлик кубоги билан ўйнади, фотографларга суратга тушди ва ҳатто майдон атрофида хавфсизликни таъминлаётган полиция ходимининг фуражкасини ҳам кийиб кўрди.
Испания матбуоти аллақачон уни «мусобақанинг асосий кашфиёти» деб атаган. Ижтимоий тармоқ фойдаланувчилари эса боланинг самимийлиги ва камера олдида ўзини эркин тутишини олқишламоқда. Кейннинг Испания голига муносабати акс этган видеолардан бири уч соат ичида қарийб 2 миллион марта кўрилган.
Кейн — Ламин Ямалнинг онаси бир, отаси бошқа бўлган укаси. У 2022 йил сентябрда туғилган. Ламин Ямал бир неча бор кичик укаси «у учун ҳамма нарса» эканини, ҳатто уни «ўғлимдек» кўришини айтган.
Кейн Испания терма жамоасининг ЖЧ-2026даги барча учрашувларида иштирок этган. У аллақачон акаси билан бирга Евро-2024 ва ЖЧ-2026даги чемпионлик шодликларини ҳам бошдан кечирди.
