АҚШ ҳарбийлари Президент Дональд Трампнинг кўрсатмасига мувофиқ Эронга қарши навбатдаги зарбаларни амалга оширди. Шу тариқа Эронга қарши ҳужумлар кетма-кет 12-кеча давом этди. Бу ҳақда 23 июль куни АҚШ Марказий қўмондонлиги (CENTCOM) маълум қилди.
Қайд этилишича, сўнгги зарбалар давомида Эроннинг денгиздаги ҳарбий салоҳияти, ракета ва дронлар сақланадиган омборлари, соҳил кузатув нуқталари ҳамда ҳаво мудофаа тизимлари нишонга олинган.
Баёнотда айтилишича, июль ойи давомида АҚШ Қуролли кучлари Эрон ҳудудидаги ўнлаб ҳарбий объектларга зарба берган. Шунингдек, денгизда Эронга қарши блокада қайта тикланган. Ҳарбийлар сўнгги зарбалар тахминан 5 соат давом этганини билдирган.
Эрон Соғлиқни сақлаш вазирлиги вакили маълум қилишича, АҚШнинг сўнгги зарбалари оқибатида 50 нафар тинч аҳоли ҳалок бўлган, 500 киши яраланган. Сўнгги кунларда урушда ҳалок бўлган АҚШ ҳарбийлари сони эса 18 нафарга етган.
Шунингдек, АҚШ Президенти Дональд Трамп 22 июль куни Эрон Ҳурмуз бўғозидаги кемаларга ҳар сафар ўқ узганида, АҚШ Эрондаги камида битта кўприк ёки электр станциясини йўқ қилишини айтган.
Эрон Қуролли кучлари қўшма қўмондонлиги эса давлат ОАВ орқали тарқатилган баёнотда, агар ушбу таҳдид амалга оширилса, Эрон минтақадаги нефть, газ, электр энергетикаси ва бошқа иқтисодий инфратузилма объектларига зарба беришини маълум қилган.
Ўтган ҳафта АҚШ Президенти Дональд Трамп дам олиш кунлари америкалик ҳарбийлар ҳалок бўлганидан кейин Эрондан қасос олишга ваъда берган. Сўнгги бир ҳафта давомида Трамп Эронда нишонга олинадиган объектлар рўйхатини энергетика иншоотлари ва кўприклар ҳисобига кенгайтириш билан таҳдид қилиб келмоқда.
Маълумот учун, 1949 йилда қабул қилинган Женева конвенцияларига кўра, уруш пайтида аҳоли ҳаёти учун муҳим бўлган фуқаролик объектларига ҳужум қилиш тақиқланади. Халқаро ҳуқуқ бўйича америкалик экспертлар Трампнинг бундай объектларга зарба бериш ҳақидаги аввалги таҳдидлари халқаро ҳуқуқ нуқтаи назаридан ҳарбий жиноят сифатида баҳоланиши мумкинлигини билдирган.
Қайд этиш жоизки, уруш давомида АҚШ ва Исроилнинг Эронга, шунингдек, Исроилнинг Ливанга берган зарбалари оқибатида минглаб одамлар ҳалок бўлган, миллионлаб киши эса ўз уйини тарк этишга мажбур бўлган. Можаро нефть нархларининг ошиши ва жаҳон молия бозорларида беқарорликка сабаб бўлмоқда.
