Кеча, 23 июль куни давлат олий таълим ва касбий таълим муассасаларига ўқишга кириш учун ўтказилган тест синовлари якунланди. Бу ҳақда Билим ва малакаларни баҳолаш агентлиги хабар берди.
Маълум қилинишича, тест синовларининг сўнгги, 10-кунида республика бўйича 45 минг нафардан зиёд абитуриент иштирок этган. Бу куни тест синовлари тартиб-қоидаларини бузган абитуриентлар аниқланмаган.
10 кун давом этган имтиҳонларда иштирок этиши белгиланган 664 минг 609 нафар абитуриентнинг 610 минг нафардан зиёди тест синовларида қатнашган. Тест синовлари тартиб-қоидаларини бузган 70 нафардан зиёд абитуриент эса жараёндан четлаштирилган.
Билим ва малакаларни баҳолаш агентлиги маълум қилишича, тест синовларида иштирок этган абитуриентлар бугун, 24 июль куни имтиҳонларнинг 10-куни натижалари эълон қилингач, 25 июльдан 8 августга қадар иккинчи босқич танловида иштирок этиши мумкин.
Ушбу босқичда абитуриентлар олий таълим муассасалари, таълим йўналишлари, таълим шакллари ва устуворликларини танлайди.
Якуний мандат натижалари иккинчи босқич танлови якунланганидан сўнг бир ҳафта ичида эълон қилиниши айтилган.
Маълумот учун, жорий ўқув йилида барча фанлар бўйича миллий ёки халқаро сертификатга эга бўлган 12 минг 997 нафар абитуриент тест синовларидан озод қилиниб, олий таълим муассасаларига қабул танловининг кейинги босқичига ўтказилган.
