Франция ва Испанияда авж олган ўрмон ёнғинлари минглаб аҳолини уйларини тарк этишга мажбур қилди. Ҳозирга қадар икки мамлакатда жами 220 мингдан ортиқ киши эвакуация қилинган.
Франциянинг Бордо шаҳри яқинида ёнғинлар кенгайиб бораётгани сабабли яна қарийб 60 минг кишини эвакуация қилиш буйруғи берилди. Бу билан мамлакат жануби ғарбидаги Жиронда ва Ланд ҳудудларидан эвакуация қилинганлар сони 200 минг нафарга етди.
Франция президенти Эммануэл Макрон ёнғинларга қарши курашиш ишларига ҳарбийларни ҳам жалб қилиш бўйича топшириқ берди.
Испанияда эса Мадрид яқинидаги учта йирик ёнғин ўчоғи бирлашиб, улкан ёнғинга айланган. Маҳаллий расмийлар уни ҳозирча ёнғин ўчирувчилар имкониятларидан ташқаридаги офат деб баҳоламоқда.
Мамлакат ҳукумати миллий фавқулодда ҳолат эълон қилди. Мадрид минтақасида ёнғинлардан 60 мингдан ортиқ киши жабр кўрган. Ҳозирга қадар 25 минг киши эвакуация қилинган, қарийб 40 минг аҳолига эса уйларидан чиқмаслик тавсия этилган.
Мадрид минтақаси раҳбари Исабель Диас Аюсо буни "минтақа тарихидаги энг йирик ёнғин" деб атади. Унинг сўзларига кўра, юқори ҳарорат, кучли шамол ва бир нечта ёнғин ўчоқларининг қўшилиши вазиятни янада оғирлаштирган.
Ёнғинлар Мадриддан тахминан 50 километр узоқликда жойлашган Робледо де Чавела ва Фреснедильяс де ла Оливия муниципалитетлари томон силжимоқда.
Мадрид ҳукумати Фавқулодда вазиятлар хизмати раҳбари Карлос Новильонинг айтишича, ёнғин ҳозир энг юқори нуқтага чиққан ва уни тўлиқ назоратга олиш имкони йўқ.
"Ҳозир бу ҳудудда ёнғинга қарши тўғридан тўғри курашишнинг иложи йўқ. Шунинг учун асосий эътибор аҳоли пунктларини ҳимоя қилишга қаратилган", деди у.
Испания Қуролли кучларининг Фавқулодда вазиятлар бўлинмаси аланганинг тарқалишини тўхтатиш учун сафарбар этилган. Асосий кучлар Эль Эскориаль шаҳри атрофини ҳимоя қилишга йўналтирилган.
Шу билан бирга, Авила вилоятидаги яна бир йирик ёнғин ҳам кузатилмоқда. Мутахассислар Бургогондо ҳудудидаги ёнғин Мадриддаги ёнғин билан қўшилиб кетишидан хавотир билдирмоқда.
