Украина Президенти Владимир Зеленский Мудофаа вазирлиги ҳамда Қуролли кучлар қўмондонлиги иштирокида ўтказилган йиғилишда Россиянинг ҳаво ҳужумлари, фронт чизиғидаги вазият ва денгиз экспорт йўлаги фаолиятини муҳокама қилди. Бу ҳақда у ўзининг Telegram-каналида маълум қилди.
Президентнинг билдиришича, йиғилишда Украина Қуролли кучлари ва ҳарбий раҳбарияти вакиллари Михайло Драпатий, Игор Скибюк, Евгений Хмара ҳамда Павло Палиса ҳисобот берган.
Зеленскийга кўра, йиғилишда Россиянинг баллистик ракета зарбалари тактикаси, унга қарши ҳарбий ва дипломатик чоралар, шунингдек, мамлакат мудофаа қобилиятини мустаҳкамлашга қаратилган техник ва асимметрик ечимлар муҳокама қилинган.
"Биз Россиянинг баллистик ракета зарбалари тактикасига қарши қўлланиладиган ечимлар ва асимметрик чораларни белгилаб олдик", деди Украина раҳбари.
Шунингдек, фронт чизиғидаги вазият, хусусан, Славянск ва Костянтиновка йўналишларидаги ҳолат, денгиз экспорт йўлагининг ишлаши ҳамда унинг кейинги фаолиятига оид режалар кўриб чиқилган.
Владимир Зеленскийнинг таъкидлашича, Украина армияси Россия назорати остидаги ҳудудларда, жумладан, Қрим яриморолида жойлашган Россия ҳарбий кучлари ва объектларига қарши ўрта масофали зарбалар бериш бўйича операцияларни давом эттирмоқда.
"Биз аниқ зарбалар бериладиган энг устувор нишонлар рўйхатини янгиладик", деди у.
Президентнинг маълум қилишича, Украина Қуролли кучлари Бош қўмондони Александр Сирскийга минтақа давлатлари ҳарбий раҳбарияти билан мувофиқлаштириш ишларини кучайтириш бўйича топшириқ берилган.
Бундан ташқари, Украина Мудофаа вазирлиги ва Президент девони вакилларидан иборат ишчи гуруҳлар Европа давлатлари билан ҳамкорликда ҳаво ҳужумидан мудофаа тизимлари учун ракета етказиб бериш жараёнини жадаллаштириш устида иш олиб бормоқда.
Зеленскийнинг айтишича, Украина Қуролли кучлари Бош штаби фронтдаги вазиятни янада аниқ баҳолаш, ўзгаришларга тезкор муносабат билдириш ва бригадаларнинг жанговар имкониятларини оширишга қаратилган тизимли ислоҳотларни ҳам тайёрламоқда.
Якунда Украина Президенти мамлакат позицияларини ҳимоя қилаётган ҳарбийларга миннатдорлик билдириб, улар Россия армиясининг қўйилган мақсадларга эришишига тўсқинлик қилаётганини таъкидлади.
