Дунёдаги энг машҳур алпинистлардан бири, саккиз минг метрдан баланд бўлган барча 14 та чўққини рекорд муддатда забт этган Нирмал Пуржа Покистондаги Броуд-Пик чўққисида содир бўлган қор кўчкиси оқибатида ҳалок бўлди. Бу ҳақда унинг Elite Exped компанияси маълум қилди.
Компания баёнотига кўра, фожиа оқибатида экспедициянинг бошқа аъзолари ҳам ҳалок бўлган. Улар Пуржани жасорати, камтарлиги ва инсон имкониятларига бўлган ишончи билан миллионлаб одамларга илҳом берган шахс сифатида эслади.
Нирмал Пуржа 2019 йилда дунёдаги саккиз минг метрдан баланд барча 14 та чўққини атиги етти ой ичида забт этиб, жаҳон рекордини ўрнатган эди. Кейинчалик у бу ютуғи ҳақида китоб ёзди, унинг фаолияти асосида Netflix томонидан "14 Peaks: Nothing Is Impossible" ҳужжатли фильми суратга олинди. 2024 йилда эса у барча 14 та чўққини қўшимча кислородсиз энг тез забт этган алпинистга айланган.
Пуржа 2026 йилда Броуд-Пикка чиқишни режалаштирмаган, аммо июль ойи охирида 10 нафар профессионал алпинистдан иборат гуруҳга бошчилик қилиб, янги рекорд ўрнатиш мақсадида экспедицияга йўл олган.
30 июль куни Броуд-Пикда қор кўчкиси содир бўлган. GPS маълумотларига кўра, қор кўчган вақтда Пуржа 6660 метр баландликда бўлган ва қисқа вақт ичида юзлаб метр пастга сурилиб кетган. Қутқарув ишларидан сўнг Непал бош вазири Балендра Шоҳ ҳам алпинист ва унинг экспедицияси аъзолари ҳалок бўлганини тасдиқлади.
