Маълум қилинишича, Андижон вилоятидаги “Андижон сув таъминоти” акциядорлик жамиятининг туман филиалларидан бири раҳбари хизмат мавқеидан фойдаланиб, мансабдор танишлари орқали 1983 йилда туғилган фуқаронинг янги қурилган хонадонига оқова сув тармоғини тортиш учун рухсатнома олиш ҳамда канализация насоси ўрнатишда ёрдам бериш эвазига 8,5 минг АҚШ доллари талаб қилган.
Давлат хавфсизлик хизмати, Бош прокуратура ҳузуридаги Департамент ҳамда ички ишлар органлари ходимлари ҳамкорлигида ўтказилган тезкор тадбирда мазкур мансабдор сўралган пул маблағини учинчи шахс орқали олган вақтида ушланди.
Яна бир ҳолат Қашқадарё вилоятида қайд этилди. Вилоят ОИТСга қарши курашиш марказининг туманлардан биридаги ОИВ диагностика лабораторияси лаборанти 1996 йилда туғилган фуқарога нисбатан тайинланган экспертиза хулосасини мансабдор танишлари орқали унинг фойдасига ижобий ҳал қилиб бериш эвазига 3 минг АҚШ доллари олган вақтида қўлга олинди.
Тезкор тадбир давом эттирилиб, лаборантдан 2,5 минг АҚШ долларини олган вақтида Республика суд-тиббий экспертиза илмий-амалий марказининг туман бўлими бошлиғи ҳам ашёвий далиллар билан ушланган.
Ҳозирда ҳар икки ҳолат юзасидан тегишли моддалар билан жиноят ишлари қўзғатилган. Айни пайтда тергов ҳаракатлари олиб борилмоқда.
