Ҳиндистонда давлат ишлари ва тиббиёт соҳасига кириш учун ўтказиладиган имтиҳонлардаги можаролар минглаб ёшларни кўчага олиб чиқди. Иштирокчилар таълим тизимидаги адолатсизлик, имтиҳон саволларининг сизиб чиқиши ва келажакка бўлган ишончнинг сўнаётганидан норози бўлмоқда. Бу ҳақда Reuters хабар берди.
Нашрнинг ёзишича, Ҳиндистондаги "Cockroach Janta Party" ("Тараканлар халқ партияси") деб номланган сатирага асосланган ҳаракат мамлакат ёшларининг норозилик рамзига айланган.
Норозиликлар миллий тиббиёт имтиҳони натижалари бекор қилинганидан кейин бошланган. Имтиҳон саволлари олдиндан тарқалгани аниқлангани сабабли қарийб 2 миллион нафар талабанинг натижалари қайта кўриб чиқилган.
Ҳиндистонда бундай имтиҳонлар миллионлаб ёшлар учун ўрта синф ҳаётига олиб борувчи асосий йўл ҳисобланади. Давлат соҳасидаги минглаб иш ўринлари — дипломатлар, маъмурлардан тортиб оддий хизмат лавозимларигача — айнан қаттиқ рақобатли имтиҳонлар орқали тақсимланади.
Бироқ бу йўл тобора қийинлашиб бормоқда. Reuters маълумотларига кўра, 2014 йилдан бери камида 20 дан ортиқ имтиҳон натижалари саволлар сизиб чиқиши сабаб бекор қилинган.
Норозиликлар марказида турганлардан бири 25 ёшли Ашок Кумар. У фермер оиласидан чиққан ва давлат хизматида ишлаш орзусида бир неча йил тайёргарлик кўрган. У ўқиш ва имтиҳонларга тайёрланиш учун оиласи жамғарган 10 минг доллардан ортиқ маблағни сарфлаган.
"Ахир мен фақат меҳнатнинг ўзи етарли бўлади, деб ўйлагандим", — деган Ашок Кумар.
У бир неча марта давлат хизмати имтиҳонларида қатнашган, аммо ҳар сафар керакли натижага эриша олмаган.
Ашокнинг укаси Абхишек Кумар ҳам шундай тақдирга дуч келган. У тиббиёт олийгоҳида ўқиш учун уч марта имтиҳон топширган. Саволлар сизиб чиққани сабаб натижалар бекор қилингач, унинг ҳам орзулари саросимага тушган.
"Мен шифокор бўлиб, онамга тақинчоқлар ва уйимизга телевизор олиб беришни истагандим", — деган Абхишек.
Норозиликлар фақат кам таъминланган оилалар фарзандларини эмас, балки Ҳиндистон ўрта синфини ҳам қамраб олди. Мамлакатда ёшлар ишсизлиги, иқтисодий тенгсизлик ва таълим тизимидаги муаммолар ҳақидаги шикоятлар кўпайган.
Маълумотларга кўра, 30 ёшгача бўлган ҳиндистонликлар умумий аҳолига нисбатан уч баробар кўпроқ ишсиз қолиш эҳтимолига эга.
20 июль куни Деҳлида 50 мингдан ортиқ одам парламент томон юришга уринган. Намойишчилар полиция қаршилигига дуч келган, аммо ҳаракат интернет орқали кенг қўллаб-қувватланган.
Намойишчилар асосий талабларидан бири сифатида имтиҳон тизимини ислоҳ қилишни илгари сурган. Кейинчалик таълим вазири Дхармендра Прадхан истеъфога чиққан.
Бу Ҳиндистон Бош вазири Нарендра Моди ҳукумати учун кам учрайдиган сиёсий ён беришлардан бири бўлди.
Ҳукумат имтиҳон саволларини сиздиришга қарши қонунларни кучайтириш, тизимни текшириш учун махсус комиссия тузиш ва можаро сабаб ўз жонига қасд қилган талабалар оилаларига компенсация тўлашини маълум қилди.
Норозиликларда 41 ёшли актриса ва режиссёр Дивя Унни ҳам қатнашган. У Мумбайдан Деҳлига келиб, ёшларни қўллаб-қувватлаган.
Унинг таниши, уй хизматкори Мамта Сингхнинг 21 ёшли қизи Симран тиббиёт олийгоҳида ўқиш учун имтиҳон топширган эди. Бироқ саволлар сизиб чиққани сабаб натижалар бекор қилингач, унинг орзулари ҳам барбод бўлган.
Мамта қизи учун ҳар йили 3 минг доллардан ортиқ маблағни имтиҳон тайёргарлигига сарфлаган. Аммо қайта топширилган имтиҳонда Симран кутилган натижани кўрсата олмаган ва тиббиёт соҳасида ўқиш режасидан воз кечган.
"Бугун қизим 21 ёшда. Бир йилдан кейин 22 ёшга тўлади ва яна шу ҳолат такрорланса-чи? Биз бу ишни бутун умр давом эттирамизми? Қачон у ўз ҳаёти билан яшайди?" — деган Мамта Сингх.
