Дунё альпинизми оғир йўқотишга учради. Покистоннинг Қорақурум тоғ тизмасида жойлашган Броуд-Пик чўққисида содир бўлган қор кўчкиси оқибатида машҳур британиялик-непаллик альпинист Нирмал Пуржа ва яна беш нафар непаллик тоғ йўлбошчиси ҳалок бўлди.
Фожиа Броуд-Пикка йўл олган 10 кишилик халқаро экспедиция вақтида юз берган. Экспедицияга 43 ёшли Нирмал Пуржа раҳбарлик қилаётган эди. У қор кўчкиси остида қолиб, ҳаётдан кўз юмди.
Нирмал Пуржа замонавий альпинизм тарихидаги энг машҳур шахслардан бири саналади. У дунёдаги баландлиги 8 минг метрдан ошадиган барча 14 та чўққини атиги олти ойдан бироз кўпроқ вақт ичида забт этиб, жаҳон рекордини ўрнатган эди. Шунингдек, у К2 чўққисини қиш мавсумида биринчи бўлиб забт этган непалликлар жамоасига ҳам бошчилик қилган.
Қор кўчкиси қурбонлари орасида тажрибали шерпалар — Кили Пемба Шерпа, Пур Баҳодур Гурунг, Гялжен Шерпа, Нима Шерпа ва Наванг Тхинду Шерпа ҳам бор.
Кили Пемба Шерпа яқиндагина дунёдаги барча 14 та саккиз минглик чўққини муваффақиятли забт этиб, альпинизмдаги энг нуфузли ютуқлардан бирига эришган эди. У Эверест чўққисига 15 марта чиққан бўлиб, икки марта икки оёғидан маҳрум бўлган альпинистларни чўққига олиб чиққан.
Пур Баҳодур Гурунг эса дунёдаги 14 та энг баланд чўққидан 12 тасини забт этган ҳамда Халқаро тоғ йўлбошчилари федерацияси (IFMGA) сертификатига эга бўлган саноқли непаллик гидлардан бири эди. У 2024 йилда Эверестда 1924 йилда бедарак йўқолган британиялик альпинист Эндрю Ирвинга тегишли деб тахмин қилинаётган этикни топган экспедиция таркибида ҳам иштирок этган.
Гялжен Шерпа Канченжанга чўққисини бир мавсумда уч марта забт этгани билан танилган. Нима Шерпа эса 2026 йилнинг ўзида тўртта саккиз минглик чўққига чиққан. Наванг Тхинду Шерпа эса Непалнинг истиқболли ёш тоғ йўлбошчиларидан бири сифатида эътироф этиларди.
Мутахассислар таъкидлашича, Нирмал Пуржанинг фаолияти Покистондаги Қорақурум тоғларига халқаро альпинистлар қизиқишининг ортишида муҳим ўрин тутган. Унинг рекордлари ва фаолияти ҳақида суратга олинган ҳужжатли фильм орқали минглаб альпинистлар мазкур ҳудуд ҳақида билиб, экспедицияларга қизиқиш билдирган.
Экспертлар Броуд-Пикдаги ҳалокат бутун дунё альпинизм ҳамжамияти учун катта йўқотиш эканини таъкидламоқда. Уларга кўра, ҳалок бўлган шерпалар нафақат мижозларни чўққига етаклаган йўлбошчилар, балки замонавий альпинизм ривожига катта ҳисса қўшган профессионал спортчилар ҳам эди.
