Тошкент вилоятининг Зангиота туманида жойлашган ишлаб чиқариш цехларидан бирида ёнғин содир бўлди. Ҳодиса оқибатида жабрланганлар йўқ.
Тошкент вилояти Фавқулодда вазиятлар бошқармаси маълум қилишича, бугун, 6 август куни соат 16:33 да Зангиота тумани "Назарбек" маҳалласи ҳудудида жойлашган ишлаб чиқариш цехларидан бирида ёнғин чиққанлиги ҳақида навбатчилик қисмига хабар келиб тушган.
Хабар ортидан воқеа жойига Фавқулодда вазиятлар хизмати қутқарув экипажлари зудлик билан етиб борган. Ёнғин соат 17:23 да қуршаб олинган, соат 17:47 да эса тўлиқ бартараф этилган.
Дастлабки маълумотларга кўра, ёнғин оқибатида жабрланганлар қайд этилмаган.
Ҳозирда ёнғиннинг келиб чиқиш сабаби ва етказилган моддий зарар миқдори аниқланмоқда.
