Ўзбекистон миллий терма жамоаси ва "Сурхон" ҳимоячиси Беҳруз Каримов фаолиятини Швейцариянинг "Лугано" клубида давом эттиради. Бу ҳақда ЎзПФЛ хабар берди.
18 ёшли футболчи Тошкентда тиббий кўрикдан ўтиб, клуб билан шартнома имзолаган. Энди у Швейцарияда ишлаш визасини расмийлаштиришини кутмоқда. Ҳужжатлар тайёр бўлгач, Каримов жамоа ихтиёрига йўл олади.
Швейцариянинг Contropiede нашри ҳам футболчи "Лугано" билан шартнома имзолаганини хабар қилди. Клуб трансферни ҳали расман эълон қилмаган, бироқ бу яқин кунларда амалга оширилиши кутилмоқда.
Каримов "Одил Жуниор" тарбияланувчиси. У 2026 йилги Жаҳон чемпионатида Ўзбекистон терма жамоаси сафида Португалия ва Колумбияга қарши ўйинларда майдонга тушган.
Футболчининг "Лугано"га ўтиши жамоанинг ўнг қанот ҳимоячиси Маттиа Занотти келажаги ноаниқ бўлиб турган бир пайтга тўғри келмоқда.
"Лугано" Швейцария Суперлигасининг дастлабки икки туридан кейин 6 очко билан иккинчи ўринда бормоқда.
