2026 йилги Жаҳон чемпионати давомида футбол юлдузлари Лионел Месси ва Криштиану Роналдуга нисбатан бир қатор хавфсизлик таҳдидлари қайд этилган. Бу ҳақда Zamon.uz нашри хабар берди.
Қайд этилишича, турнир давомида АҚШ Федерал қидирув бюроси ҳамда Халқаро полиция ҳамкорлик маркази футболчилар ва бошқа иштирокчиларга нисбатан таҳдидларни текширган.
Лионел Месси бир неча бор таҳдидлар марказида бўлган. Аргентина терма жамоасининг Иордания ва Мисрга қарши учрашувлари олдидан стадионлар ҳамда футболчининг ўзига нисбатан ҳужум қилиш билан боғлиқ таҳдидлар келиб тушган.
Хусусан, Аргентина — Иордания учрашуви олдидан Даллас аэропортига номаълум шахс қўнғироқ қилиб, стадионга қурол ва портловчи моддалар билан кириб, Мессига ҳужум қилиш билан таҳдид қилган.
Аргентина — Миср учрашуви олдидан эса ижтимоий тармоқларда Мессига нисбатан зўравонлик таҳдидлари тарқалган. Шунингдек, стадионга портловчи қурилмалар жойлаштирилгани ҳақида хабар келиб тушган. Ҳуқуқ-тартибот идоралари хизмат итлари ёрдамида стадионни текширган, аммо хабар ёлғон экани аниқланган.
Криштиану Роналду билан боғлиқ ҳолатлар ҳам қайд этилган. FIFA португалиялик футболчининг қаерда истиқомат қилаётгани ҳақида маълумот олишга уринган шубҳали шахс ҳақида ҳуқуқ-тартибот идораларини хабардор қилган. Кейинчалик мазкур шахс Португалия терма жамоаси жойлашган меҳмонхонада ушланган.
Торонто шаҳрида эса Роналду турган меҳмонхона лифтига киришга уринган яна бир шахс ушланган. У футболчи билан селфи тушиш ниятида бўлганини айтган. (Talksport)
Жаҳон чемпионати давомида ҳакамлар ҳам таҳдидларга дуч келган. Аргентина — Миср учрашувидан кейин француз ҳаками Франсуа Летексье ўзининг шахсий "WhatsApp" аккаунтига 6 мингдан ортиқ ҳақорат ва таҳдид мазмунидаги хабар олган. ВАР ҳаками Вилли Делажо ҳам шунга ўхшаш таҳдидларга дуч келган.
Ҳодисалардан сўнг Францияда ҳакамлар ва уларнинг оила аъзолари хавфсизлигини таъминлаш чоралари кучайтирилган.
Таъкидлаш жоизки, Мессига нисбатан айтилган портлаш ва ҳужум таҳдидлари текширилган бўлса-да, стадионларда ҳақиқий портловчи қурилма топилмаган.
