"Барселона"нинг швециялик қанот ҳужумчиси Руни Бардагжи машғулот вақтида тиззасидан жиддий жароҳат олган бўлиши мумкин. Бу ҳақда Испаниянинг "Спорт" нашри хабар берди.
20 ёшли футболчи машғулот пайтида бошқа футболчи билан тўқнашмасдан йиқилган. У кучли оғриқ сабабли машғулотни давом эттира олмаган.
Дастлабки маълумотларга кўра, Бардагжи тизза боғламларидан бири, хусусан, олд хочсимон боғламидан жароҳат олган бўлиши мумкин. Бироқ футболчида айнан шу боғлам узилгани ҳозирча расман тасдиқланмаган.
Жароҳатнинг аниқ тури ва оғирлик даражаси тиббий текширувлардан кейин маълум бўлади. Агар олд хочсимон боғлам узилгани тасдиқланса, Бардагжи бир неча ойга футболдан четда қолиши мумкин. Айрим маълумотларга кўра, унинг тикланиши 10 ойгача давом этиши эҳтимоли бор.
Бу швециялик футболчи учун тиззасидан олаётган биринчи жиддий жароҳат эмас. У 2024 йил май ойида "Копенгаген" сафида ўйнаётган пайтида олд хочсимон боғламини узган ва қарийб бир йил футболдан четда қолган.
Руни Бардагжи 2025 йил июль ойида "Копенгаген"дан "Барселона"га ўтган. Каталония клуби футболчи билан 2029 йилгача шартнома тузган.
