Бугун, 10 август куни Колумбиянинг ғарбий қисмида 7,4 магнитудали кучли зилзила содир бўлди. Ер силкиниши мамлакатнинг бир қатор ҳудудлари, шунингдек, қўшни Эквадорда ҳам сезилган. Бу ҳақда "Associated Press" хабар берди.
АҚШ Геология хизмати маълумотларига кўра, зилзила эпицентри пойтахт Боготадан қарийб 280 километр ғарбда, Чоко департаментидаги Сан-Хосе-дель-Пальмар муниципалитети яқинида жойлашган. Зилзила ўчоғи 107 километр чуқурликда қайд этилган.
Кучли ер силкиниши ортидан аҳоли хавфсизлик мақсадида уйлар ва биноларни тарк этган. Чоко департаменти губернатори Нубия Каролина Кордоба Кури минтақада жароҳатланганлар борлиги ва биноларга жиддий зарар етганини маълум қилган.
Кейинги хабарларга кўра, зилзила оқибатида қурбонлар ва жароҳатланганлар сони ортиб борган, бир қатор шаҳарларда бинолар вайрон бўлган. Қутқарув ишлари давом эттирилмоқда.
Зилзила Колумбия билан бир қаторда Эквадор ва Панаманинг айрим ҳудудларида ҳам сезилган.
Эслатиб ўтамиз, жорий йил 24 июнь куни Венесуэлада 7,2 ва 7,5 магнитудали иккита кучли зилзила содир бўлган эди. Кейинчалик мамлакат расмийлари қурбонлар сони бир неча минг нафарга етганини маълум қилган. Жаҳон банки маълумотларига кўра, ушбу зилзилалар оқибатида тахминан 5 минг киши ҳалок бўлган.
