Россиянинг Екатеринбург шаҳрида Lamborghini спорткарининг аварияга учраши акс этган видео тарқалди. Кадрларда автомобиль йўлдан чиқиб кетиб, турар жой биносига бориб урилгани кўринади. Ҳодиса 11 август куни содир бўлган.
Маълумотларга кўра, фиолет рангли Lamborghini Отрадная кўчасида катта тезликда ҳаракатланиб, йўл четидаги тротуарга чиқиб кетган ва бино деворига урилган. Ҳодиса оқибатида икки киши жароҳатлангани ҳақида хабар берилган.
Ижтимоий тармоқларда тарқалган видеода авариядан кейинги ҳолат ҳам акс этган. Ҳозирда ҳуқуқ-тартибот идоралари ҳодисанинг барча тафсилотларини аниқламоқда.
ОАВ маълумотларига кўра, Lamborghini билан боғлиқ тўқнашувдан сўнг воқеа жойидан кетиб қолган кулранг автомобиль ҳайдовчиси ҳам қидирилган. Кейинчалик унинг шахси аниқлангани ҳақида хабарлар тарқалди.
Қайд этиш жоиз, мазкур ҳодисада Lamborghini рул бошқарувида ким бўлгани расмий равишда очиқланмаган.
Айрим ОАВлар эса автомобиль Россиялик миллиардер Игорь Алтушкинга тегишли эканини ва унинг ўғли Давид Алтушкин рулда бўлганини ёзган. Бироқ бу маълумот расмий идоралар томонидан тасдиқланмаган.
