АҚШ Президенти Дональд Трамп учинчи муддатга президентликка номзодини қўйишни хоҳлашини айтди. Бироқ у АҚШ қонунчилиги бунга йўл қўймаслигини таъкидлади. Трамп бу ҳақда Вашингтон яқинидаги Эндрюс ҳарбий базасига ташрифи чоғида журналистлар билан суҳбатда маълум қилди.
"Мен номзодимни қўйишни хоҳлардим, лекин қонун жуда қатъий", деди Трамп.
Унинг сўзларига кўра, "ҳамма" унинг учинчи муддатга ҳам сайловда қатнашишини хоҳламоқда.
АҚШ Конституциясига 1951 йилда киритилган 22-тузатиш президентлик лавозимига бир шахснинг икки мартадан ортиқ сайланишини тақиқлайди. Шу сабабли Трампнинг 2028 йилги сайловда учинчи муддатга номзод бўлиши амалдаги қонунчиликка зид ҳисобланади.
Трамп 2024 йил ноябрь ойидаги президентлик сайловида Демократик партия номзоди Камала Ҳаррисни мағлуб этиб, иккинчи муддатга сайланган. У илк бор 2017–2021 йилларда АҚШ президенти лавозимида фаолият юритган.
Трамп аввал ҳам учинчи муддатга президентлик қилиш эҳтимоли ҳақида бир неча бор гапирган. 2026 йил июль ойида эса у "Trump 2028" ёзуви туширилган бош кийимда ҳам кўриниш берган.
