Навоий шаҳрида 340 миллион сўмлик ноқонуний олтин савдосининг олди олинди. Бу ҳақда Давлат хавфсизлик хизмати ҳамда Иқтисодий жиноятларга қарши курашиш департаменти хабар берди.
Қайд этилишича, “Хавфсиз ва соғлом юрт” тезкор-профилактик тадбирлари доирасида ўтказилган тезкор тадбир давомида Бухоро вилоятининг Шофиркон туманида яшовчи, 1987 ва 1993 йилларда туғилган икки нафар шахс қўлга олинган.
Улар 212,9 грамм қуйма олтинни харидорга 340 миллион сўмга сотишга келишган. Тезкор тадбир вақтида гумондорлар харидорга 999 пробали 26,3 грамм олтинни бериб, қолган қисмини кейинроқ етказиб беришни ваъда қилган.
Шунингдек, улар харидордан 20 минг АҚШ доллари ва 100 миллион сўмни олган вақтда ашёвий далиллар билан ушланган.
Тезкор тадбир давомида гумондорлардан бирининг яшаш хонадонида қум таркибидан олтинни ажратиб олишга мўлжалланган яширин цех ҳам аниқланган.
Мазкур ҳолат юзасидан Жиноят кодексининг 177-моддаси 4-қисми “а” банди билан жиноят иши қўзғатилган. Ҳозирда тергов ҳаракатлари олиб борилмоқда.
Давлат хавфсизлик хизмати фуқароларни кундалик ҳаётда шу каби қонунбузарлик ҳолатларига дуч келган тақдирда, 1520 қисқа рақами орқали хабар беришга чақирди. Мурожаат қилувчининг шахси сир сақланиши кафолатланади.
