"Манчестер Сити" ҳужумчиси Эрлинг Холанд футболдаги бир қатор рекордлари учун Гиннесс Жаҳон рекордлари ташкилотининг тўртта расмий сертификатига эга бўлди. Сертификатлар футболчига жамоанинг "Этиҳад" стадионидаги янги мавсум олдидан топширилди.
Норвегиялик ҳужумчи қуйидаги натижалари билан Гиннесс Жаҳон рекордлари рўйхатига киритилган:
-
УЕФА Миллатлар лигасида энг кўп гол урган футболчи — 19 та гол. Холанд Норвегия терма жамоаси сафида мусобақа тарихида 19 марта рақиблар дарвозасини ишғол қилган.
-
Англия Премьер-лигасида 100 та голга энг тез етган футболчи — 111 та учрашув. Холанд ушбу натижага 2025 йил 2 декабрь куни "Фулҳэм"га қарши ўйинда эришган.
-
38 учрашувлик Премьер-лига мавсумида энг кўп гол — 36 та. Холанд 2022/2023 йилги мавсумда 36 та гол уриб, ушбу рекордни ўрнатган. У Муҳаммад Салоҳнинг 32 та голлик натижасини ортда қолдирган.
-
Чемпионлар лигасининг битта учрашувида энг кўп гол — 5 та. Холанд 2023 йил 14 март куни "РБ Лейпциг"га қарши баҳсда беш марта гол урган. Ушбу натижага ундан аввал Лионель Месси ва Луис Адриано ҳам эришган.
26 ёшли Холанд ҳозирда "Манчестер Сити" ва Норвегия терма жамоасининг асосий ҳужумчиларидан бири ҳисобланади. Гиннесс Жаҳон рекордлари маълум қилишича, футболчи ташкилотнинг 2027 йилги "Football Edition" нашри муқовасидан ҳам ўрин олган.
