Тошкент шаҳрининг Учтепа туманидаги хонадонда содир бўлган ёнғинни бартараф этиш вақтида Фавқулодда вазиятлар вазирлиги махсус қутқарув батальони гуруҳ командири, капитан Бобурмирзо Пардаев ҳалок бўлди. Бу ҳақда ФВВ хабар берди.
Маълум қилинишича, 15 августга ўтар кечаси соат 03:41 да “112” тизими орқали “Қуйи Дархон” маҳалласидаги хонадонлардан бирида ёнғин чиққанлиги ҳақида хабар келиб тушган. Шундан сўнг қутқарувчилар зудлик билан воқеа жойига етиб бориб, ёнғинни ўчиришга киришган.
Қутқарувчилар ёнғинни бартараф этиш билан бирга, хонадонда бўлган аҳолини хавфсиз ҳудудга эвакуация қилган. Капитан Бобурмирзо Пардаев ҳам одамларни қутқариш ишларида фаол иштирок этган.
Бироқ ёнғинни ўчириш жараёнида қутқарувчи капитан Бобурмирзо Пардаев ҳалок бўлган.
ФВВ марҳум қутқарувчининг оила аъзолари ва яқинларига ҳамдардлик билдириб, унинг инсон ҳаётини ўз хавфсизлигидан устун қўйган ҳолда хизмат бурчини бажарганини таъкидлади.
