Бельгияда мамлакат тарихидаги сўнгги йиллардаги энг йирик ёнғинлардан бири учинчи кундирки давом этмоқда. Hautes Fagnes қўриқхонасидаги ёнғин 3 минг гектар майдонни қамраб олган. Бу ҳақда BBC нашри хабар берди.
Юзлаб ўт ўчирувчилар ёнғинга қарши курашмоқда. Ёнғин сабаб яқин атрофдаги икки қишлоқ аҳолиси эвакуация қилинган.
Қутқарув ишларига Швеция ва Нидерландиядан юборилган сув сепувчи самолётлар, шунингдек, Бельгия ва Нидерландияга тегишли тўртта вертолёт жалб қилинган. Маҳаллий фермерлар ҳам сув ташиш машиналари билан ёрдам бермоқда.
Маҳаллий расмийларга кўра, ёнғин жума куни 80 гектар майдонда бошланган. Шанба кунига келиб 850 гектарга, якшанба эрталаб эса 3 минг гектарга тарқалган.
Юқори ҳарорат, шунингдек, қўриқхонада ботқоқлик ва ўрмонлар кўплиги ёнғинни ўчириш ишларини қийинлаштирмоқда. Айрим ҳудудларга етиб бориш имконсиз бўлгани сабабли ёнғин ўчирувчилар ёнғиннинг айрим қисмларини назорат остида ёндиришга мажбур бўлган.
Расмийлар ёнғиннинг икки йўналиши — Жалхай ва Моншау томони назоратга олинганини билдирган. Ҳозирча ёнғин оқибатида бирор уй зарар кўрмаган. Ёнғиннинг келиб чиқиш сабаби эса ҳали аниқланмаган.
