Давлат раҳбари мулоқот давомида тадбиркорларнинг таклиф ва ташаббусларини тинглаб, уларнинг замонавий фикрлаши, бизнесини кенгайтириш ва янгиликка интилиши мамлакат тараққиёти учун муҳим эканини қайд этди.
“Сизлар билан гаплашиб, бир нарсага амин бўлдим. Юртимизда замонавий фикрлайдиган, ўз бизнесини кенгайтириш учун янгиликка интилаётган янги авлод тадбиркорлари шаклланмоқда.
Ҳеч қачон олдинга интилишдан, ўсишдан, ривожланишдан, янгилик қилишдан тўхтаманг! Сизларнинг ортангизда доимо қўллаб-қувватлайдиган кучли давлат, ҳуқуқ ва манфаатингизни ҳимоя қиладиган қонун, ташаббус ва мақсадларингизни рўёбга чиқаришда елкадош бўлган Президент бор!”— деди Президент.
Шавкат Мирзиёев мулоқот якунида йиғилганларни яна бир бор Тадбиркорлар куни билан табриклади.
Давлат раҳбари тадбиркорларга сиҳат-саломатлик, ишларида ривож ва оилавий хотиржамлик тилади.
