Лондоннинг "Челси" клуби эгалари Тодд Боули ва Марк Уолтер жамоадаги улушларини сотиш ниятида. Бу ҳақда "Financial Times" хабар берди.
Нашр маълумотларига кўра, Боули ва Уолтер ўз улушларини "Челси" акцияларининг қарийб 60 фоизига эгалик қилувчи Clearlake компаниясига сотиш бўйича музокаралар олиб бормоқда.
Тодд Боули ва Марк Уолтер 2022 йилда клубни Роман Абрамовичдан 2,5 миллиард фунт стерлингга сотиб олган инвесторлар гуруҳи таркибида бўлган.
Клуб сотиб олинганидан кейин Боули ва Уолтер "Челси" стратегияси борасида Clearlake билан бир неча бор келишмовчиликларга борган.
Айни пайтда музокаралар Марк Уолтернинг бизнес активлари турли тартибга солувчи органлар назоратига тушган бир даврда кечмоқда.
66 ёшли америкалик тадбиркор айрим муҳим активларини ҳам сотишга ҳаракат қилмоқда. У яқинда NBAдаги "Лос-Анжелес Лейкерс" клубидаги улушини рекорд даражадаги 12 миллиард доллар баҳога сотган.
Қайд этиш жоиз, аввалроқ Amazon асосчиси Жефф Безос иштирокидаги консорциум Англиянинг "Ливерпуль" клубидан озчилик улушни сотиб олган эди.
