Қирғизистон 2026 йилнинг январь-июнь ойларида 3 млн 284,1 минг долларлик тирик ҳайвон экспорт қилди. Уларнинг асосий қисми Ўзбекистонга етказиб берилган. Бу ҳақда Қирғизистон Миллий статистика қўмитаси маълумотлари асосида хабар берилди.
Олти ойда Қирғизистондан хорижга 14 минг 823 бош йирик шохли қорамол чиқарилган. Уларнинг экспорти 2025 йилнинг шу даврига нисбатан жисмоний ҳажмда 32 фоизга ошган.
Шунингдек, 84,8 минг долларлик 194 бош от экспорт қилинган. Отлар экспорти жисмоний ҳажмда 27,6 фоизга кўпайган.
Тирик уй паррандаларининг хорижга чиқарилиши эса кескин камайган. Олти ойда 3,5 минг долларлик 5 минг 600 та парранда экспорт қилинган. Бу 2025 йилнинг январь-июнь ойларидаги кўрсаткичнинг 24,1 фоизини ташкил этган.
Қўй ва эчкилар экспорти эса йилнинг биринчи ярмида амалга оширилмаган.
Қирғизистондан тирик ҳайвонларни импорт қилувчи мамлакатлар орасида Ўзбекистон мутлақ етакчи бўлган. Мамлакат Қирғизистондан экспорт қилинган чорва молларининг деярли барчасини харид қилган.
Шу билан бирга, Қирғизистоннинг ўзи ҳам тирик ҳайвонлар импортини амалга оширган. 2026 йилнинг январь-июнь ойларида мамлакатга 4 млн 439,5 минг долларлик тирик ҳайвон олиб кирилган.
Импорт таркибида энг катта улуш тирик уй паррандалар ҳиссасига тўғри келган. Олти ойда Қирғизистонга 1 млн 521,9 минг долларлик 915 минг 169 та парранда олиб кирилган. Бу кўрсаткич қиймат жиҳатидан ўтган йилнинг шу даврига нисбатан 39,2 фоизга ошган.
Йирик шохли қорамоллар импорти 1 млн 218,5 минг долларлик 5 минг 285 бошни ташкил этган. Жисмоний ҳажмда бу ўтган йилги кўрсаткичнинг 37,5 фоизига тенг.
Шу даврда 1 млн 62,4 минг долларлик 1 минг 123 бош от импорт қилинган. Отлар импорти жисмоний ҳажмда 37,6 фоизга камайган.
Тирик чўчқалар импорти эса жисмоний ҳажмда 2,36 баробарга ошган. Қирғизистонга 636,7 минг долларлик 3 минг 464 бош тирик чўчқа олиб кирилган.
