Эроннинг давлатга қарашли "Қоран ТВ" телеканали эфирида АҚШ Президенти Дональд Трампни ўлдирган шахсга бериладиган мукофот учун пул йиғишга чақириқ янгради. Бу ҳақда "JFeed" нашри хабар берди.
Маълум қилинишича, эфир 15 август куни намойиш этилган. Дастур бошловчиси Марям Қосимий томошабинлардан Трампни ўлдирган шахсга бериладиган мукофот учун қанча маблағ ажратишга тайёр эканини сўраган.
Қосимий эфир давомида Трампнинг ўлими ҳақидаги истагини ҳам билдирган ва уни ўлдириш "шарафи" ўзига насиб этишини умид қилган.
Бошловчи томошабинларни мукофот миқдорини оширишга чақириб, Трампнинг қотилига қанча пул беришга тайёр эканликларини айтишни сўраган.
"Биз томошабинларимиздан Трампнинг қотилига қанча мукофот берган бўлардингиз, деб сўрамоқчимиз. Ҳақиқий рақамларни айтинг. Менимча, бу жуда катта мукофот бўлиши керак", — деган у.
Эфирда маълум қилинишича, шу вақтга қадар Трампни ўлдирган шахсга бериладиган мукофот учун 81 млн туман, яъни 810 млн Эрон риали йиғилган. Кейинчалик ўзини шифокор сифатида таништирган фуқаро қўшимча маблағ қўшиб, умумий суммани 100 млн туманга етказган. Дастлаб йиғилган 810 млн риал тахминан 435 АҚШ долларига тенг бўлган.
Шунингдек, Қосимий эфирда Эрон халқининг умумий истаги Трампнинг ўлими ҳақидаги хабарни эълон қилиш эканини айтган.
Қайд этиш жоиз, бу чақириқ телеканал эфирида янграган бўлиб, уни Эрон ҳукуматининг расмий қарори ёки давлат сиёсати сифатида баҳолашга асос бўладиган маълумотлар хабарда келтирилмаган.
