Эрон Ироқнинг бир неча бор қилган мурожаатларидан сўнг мамлакат нефтини ташувчи айрим танкерларга Ҳормуз бўғозидан ўтиш учун махсус рухсат берди. Бу ҳақда хорижий манбаларга таяниб Zamon.uz хабар берди.
Махсус рухсат масаласи Ироқ парламенти спикери Муҳаммад Боқир Қолибафнинг Эронга ташрифи давомида Бағдод томонидан кўтарилган асосий талаблардан бири бўлган.
Ироқ расмийлари маълум қилишича, сўнгги кунларда Эрон Ироқ нефтини ташувчи кемаларнинг бўғоздан ўтишини енгиллаштирган. Томонлар, шунингдек, Ироқ нефтини Ҳормуз орқали экспорт қилиш масаласини муҳокама қилган. Бироқ Ироқ президенти Низар Амедий вазият ҳануз мураккаблигича қолаётганини таъкидлаган.
Ҳормуз бўғозида кемалар ҳаракатининг кескин камайиши Ироқ нефть экспортига жиддий таъсир кўрсатмоқда. Айни пайтда бўғоз орқали қатнов урушдан олдинги кўрсаткичлардан анча паст ва ҳудудда кемаларга ҳужумлар ҳам давом этмоқда.
Шу сабабли Ироқ нефть экспорти учун муқобил йўналишларни кенгайтиришга ҳаракат қилмоқда. Хусусан, мамлакат Туркиянинг Жейҳан порти орқали экспорт ҳажмини ошириш, шунингдек, Сурия ва Иордания портлари орқали нефть етказиб бериш имкониятларини кўриб чиқмоқда.
