Ўзбекистон Президенти Шавкат Мирзиёев АҚШ Президенти Дональд Трампга Вашингтондаги паркка ўрнатиш учун анъанавий ўзбек услубидаги икки айвонни совға қилди. Бу ҳақда “The New York Times” хабар берди.
Қайд этилишича, айвонлар Вашингтондаги Ғарбий Потомак паркига ўрнатилади. Мазкур ҳудудда Трамп ташаббуси билан Америка қаҳрамонлари миллий боғини ташкил этиш режалаштирилган.
АҚШ Ички ишлар вазирлиги коммуникациялар бўйича директори Кэти Мартиннинг айтишича, Мирзиёев ўзбекларнинг анъанавий айвонларини Трампга АҚШ халқи номидан қабул қилиши учун совға қилган. Айвонларни куз охирига қадар паркка ўрнатиш режалаштирилган.
Ўзбекистоннинг АҚШдаги элчиси Фурқат Сидиқов ҳам совға ҳақида фикр билдириб, ўзбек санъати Вашингтондаги Миллий қаҳрамонлар боғининг бир қисмига айланишидан фахрланишини таъкидлади.
“Икки анъанавий ўзбек айвони — Ўзбекистон Президентининг АҚШ Президенти ва Америка халқига совғаси — дўстлигимиз ва стратегик шериклигимизнинг рамзи бўлади”, — деб ёзди элчи.
Трамп режалаштираётган лойиҳа доирасида паркда ҳовузлар, умумий овқатланиш масканлари, амфитеатр ҳамда машҳур америкаликларнинг 250 та реал ўлчамдаги ҳайкалини ўрнатиш кўзда тутилган.
