Авиакомпания маълум қилишича, ҳаво кемасида техник носозлик юзага келганидан сўнг парвозни захира ҳаво кемасида амалга оширишга қарор қилинган.
Кутиш вақтида йўловчиларга зарур ёрдам кўрсатилгани айтилмоқда. Компаниянинг таъкидлашича, дастлаб йўловчиларга салқин ичимликлар ва сэндвичлар, кейинчалик эса иссиқ овқат учун ваучерлар ҳамда сув берилган.
Бироқ ижтимоий тармоқларда тарқалган видеода айрим йўловчилар уларга фақат нон ва булочка берилганини айтган.
“Битта нон, битта булочка бериб қўйишяпти. Ёшлар майли, булочка еди. Ёши катталар нима ейди? На иссиқ чой берилгани йўқ ҳеч кимга”, дейди видеомурожаатда йўловчилардан бири.
Авиакомпания маълумотига кўра, рейс жадвалидаги ўзгаришлар ва кейинги янгиланишлар ҳақидаги маълумотлар йўловчилар ҳамда уларни кутиб олувчилар учун махсус ахборот каналида тезкор эълон қилиб борилган. Бу маълумотлар “uzairways_live” Telegram-канали орқали берилган.
Компания кутиш вақтини янада чўзиб юбормаслик мақсадида Истанбул–Тошкент йўналиши бўйича захира ҳаво кемасида йўловчиларни олиб келиш рейси ташкил этилганини билдирди.
“Бундай узоқ давом этган кечикиш йўловчилар учун қанчалик ноқулай бўлишини тушунамиз. Юзага келган ҳолат учун афсусдамиз”, дейилади авиакомпания баёнотида.
