АҚШ маъмурияти жамоатчиликдан президент Дональд Трампнинг 10 ёшли ўғли Бэрронни муҳокама қилишдан тўхташни сўради, деб хабар берди “Lenta.ru” нашри.
Мазкур хабар Оқ уй сайтида эълон қилинди.
“Азалий анъаналарга кўра, президентнинг фарзандларига сиёсий эътибор қаратишсиз улғайиш имкони берилади. Оқ уй бу анъананинг давом этишини кутмоқда. Мазкур муаммони ҳал этишда ҳамкорлик қилганингиз учун миннатдорчилик билдирамиз”, дейилган хабарда.
Интернет фойдаланувчилари отасининг инаугурациясида ўзини ғалати тутган Бэррон Трампнинг устидан кулишди. Улар Бэрронни ақли заиф, ривожланишдан орқада қолган болага ўхшатишган. У жияни, опаси Иванка Трампнинг қўлидаги боласи билан ўйнагани ҳам турли гап-сўзларга сабаб бўлди.
NBC телеканалидаги Saturday Night Live телешоуси сценарий муаллифи Кэти Рич Бэррон ҳақидаги твитни эълон қилгани учун уни телеканал вақтинча ишдан четлаштирди. Уни ОАВ ва ижтимоий тармоқлар фойдаланувчилари танқид қилгандан кейин Бэррон ҳақида ёзган изоҳини ижтимоий тармоқлардан олиб ташлаб, кечирим сўради.
Билл ва Хиллари Клинтоннинг 36 ёшли қизи Челси Клинтон ҳам Бэрроннинг тарафини олди. “Бэррон Трамп ҳам ҳар бир болага зарур бўлгани каби бола бўлиш имкониятига эга ва ҳақли”, деб ёзди у ўзининг Facebook саҳифасида.
Бу воқеадан кейин ижтимоий тармоқлар фойдаланувчилари Бэрроннинг аутизм касаллигидан азият чекишини, ота-онаси буни яшириб келганлиги ҳақидаги баҳс-мунозарани авжига чиқарди. Мазкур хабар илк бора 2016 йилнинг ноябрь ойида, Дональд Трамп ғалабага эришган пайтида маълум бўлганди. Ўшанда Мелания Трамп бундай гапни тарқатган блогерни судга бериш билан таҳдид қилганди.
