Исроил Миллий хавфсизлик вазири Итамар Бен-Гвир Фаластинга гуманитар ёрдам олиб кетаётган “Сумуд” флотилияси фаоллари қўлга олинганидан кейинги ҳолат акс этган видеони эълон қилди. Видеода фаолларнинг тиз чўктирилгани ва уларга Исроил мадҳияси эшиттирилгани халқаро танқидларга сабаб бўлди.
Видеода қўлга олинган фаоллар қўллари орқага қайрилган ҳолда олиб кетилгани, кейин эса бетон майдонда тиз чўктирилиб, бошларини ерга эгишга мажбурлангани тасвирланган. Шунингдек, уларга Исроил мадҳияси қўйиб берилгани ҳам кўринади.
Кадрлар фонида Бен-Гвирнинг қўриқчиларга “уларнинг қичқириқларига эътибор берманг” дегани эшитилади. Вазир видео остида “Терроризм тарафдорларини мана шундай кутиб оламиз” деб ёзган.
Мазкур ҳолат нафақат Европа давлатлари, балки Исроил расмийлари томонидан ҳам танқид қилинди. Исроил бош вазири Биньямин Нетаньяху мамлакат “провокацион флотилиялар”нинг ҳудудий сувларга киришини тўхтатишга ҳақли эканини айтган бўлса-да, Бен-Гвирнинг ҳаракатлари “Исроил қадриятлари ва меъёрларига мос эмас”лигини таъкидлади.
Исроил ташқи ишлар вазири Гидеон Саъар эса Бен-Гвирни “давлатга уятли шоу орқали зарар етказганликда” айблади.
Буюк Британия ташқи ишлар вазири Иветт Купер видеодан “даҳшатга тушгани”ни билдириб, бу инсон шаъни ва қадр-қимматига зид эканини айтди.
Италия бош вазири Жоржа Мелони эса фаоллар, жумладан Италия фуқаролари таҳқирлангани учун Исроилдан расмий узр сўрашни талаб қилди. Шунингдек, Италия ташқи ишлар вазирлиги Исроил элчисини чақиртириши маълум қилинди.
Канада ва Нидерландия ҳам Исроил элчиларини чақириш ниятида эканини билдирган.
